Muhammad Rafi kii vafaat par KHiraaj-i-'aqiidat
gaa'ikii hai Husn-i-fan teraa Rafi
tere fan pih ham sabhii ko naaz hai
tere shah-kaaroN ne samjhaayaa hameN
zindagaanii pyaar kaa ik saaz hai
merii sargam meN bhii teraa zikr hai
mere giitoN meN tirii aavaaz hai
apnii mausiiqii pih sab ko faKHr hotaa hai magar
mere saathii aaj mausiiqii ko tujh par naaz hai
.....................................................................
maHfiloN ke daamanoN meN saaHiloN ke aas-paas
yih sadaa guuNje gii sadiyoN tak diloN ke aas-paas
.............................................................................
Allah Allah Rafi kii aavaaz
ruuH-i-Mahmood-o-jaan-i-bazm-i-Ayaaz
us kii har taan, us kii har lai par
bajne lagte the KHud diloN ke saaz
...........................................................................
shaKHsiyyat dil-navaaz rakhtaa thaa
kyaa gale meN gudaaz rakhtaa thaa
apne hoN yaa paraa'e sab ke liye
dil kaa darvaazah baaz rakhtaa thaa
.........................................................................
kabhii is paar awr kabhii us paar
bahtii nadiyaa thii us kii har aakaar
yaad karte haiN sab misaaloN meN
us kaa vuh chihrah us kaa vuh kirdaar
...................................................................
kabhii barchhii kabhii kaTaar thaa vuh
giit saNgiit kii bahaar thaa vuh
'ishq awr prem us kaa thaa paiGhaam
dil kii dunyaa kaa taaj-daar thaa vuh
....................................................................
muskuraatii nazar churaa'e hu'e
chal diyaa Haq se lau lagaa'e hu'e
Hashr tak log gaate jaa'eN ge
jo taraane haiN us ke gaa'e hu'e
Naushad Ali
...........................................................................
No comments:
Post a Comment